ارحمي يا راحت العقل ترحامي
من جفاك طال سقامي

كيف نبقى حاير وانت مسلية
روفي يا الغزال فاطمة


القسم 1

امولاتي الحب الهوى والعشق ونار لغرام

من حالت اصاب عطيا قامو

كل واحد دار مقامو

في مهجتي وضحى بحسامو

مع سهامو

يطعن وزيد بالجراح عدامي
في غراض هاد الدامي

غير ملكت عقلي بجمالها وغلقت عنوة باب المراحمة


القسم 2

امولاتي ما كان هاكدا ضني يا بنت الكرام

تعدبي بغير سباب غلامك

بعد ما قبلت قدامك

بالقهر راعيت دمامك

من غرامك

ضاعت بجفاك الطويل اليامي يا غرايبي وهيامي

لاش عاقبتيني بالظلم بعد ما طعتك وانت الظالمة


القسم 3

امولاتي شوفي بعين لمحنة في هدا الغلام

افاطمة أنت بالحال سليمة

حالتي من جفاك سقيمة

كيف نبقى منسي ديمة

بلا جريمة

واش أنت اليوم سمعك صامي جاوبي جواب كلامي

بغيتك تصفي داك القلب لاينانا عبدك وأنت الحاكمة


القسم 4

امولاتي افاطمة تبخلي لي حتى بالكلام

ما جا ارسول ما قلتي لي كلمة

واش ما في قلبك رحمة

ياللي زرت بالحكمة

وحبك كمى

في قلب القلب زند نار ضرامي بردي الصهد الحامي

بالوصال والمصال اللي فشفتك ديك العدبية الناسمة


القسم 5

امولاتي ايمتا نشوف قدك يتمايز كعلام

منو الياس والريحان تعلم

والشعر الغسيق مظلم

كغراب عليه مرسم

والضياء عم

يلوح من الجبين تورو سامي به تايزول غتامي

والحواجب نونين معرقين وشفار بغير مدام نايمة



القسم6

امولاتي عينيك زوج كيسان من عتيق المدام

من داق منهم شي يصبح هايم

العطر في الخد الناعم

ورد عكري تحت سوارم

فاح ناسم

المعيطس طار به منامي
بين الورود نسامي

والسنان حسن منحب الغمام والجيدغزال خشا الرمى

القسم7

امولاتي وأنا دخيل جيدك جودي لي بالمرام

روض الرضا يفوح عليا بنسيم

وقت نرى وجهم الوسيم

فاطمة قبلي عبد اخديم

قالت الريم

قبلتك طول الزمان غلامي

لا تضن تبقى ضامي

وحق نهدي حتى نهدي كيوس
حضرتك تشفي حرقت الضما

القسم 8

امولاتي خدي نفرشو بالشوق لدوك القدام

وانقولك افاطمة زضمي

يا اللي داويتي جسمي

آمري بالعز واحكمي

ولا تحشمي

نشوفك يا الباهية قدامي والرقيب بصرو عامي

والحسود فغفلة وآنا معك تحت خيام الليل المخيمة